နှလုံးကျန်းမာဖို့ ကိုယ်လက်လေ့ကျင့်ခန်းလုပ်ကြစို့

နှလုံးကျန်းမာဖို့ ကိုယ်လက်လေ့ကျင့်ခန်း လုပ်ကြစို့‼️

နှလုံး🫀နဲ့ဆက်စပ်တဲ့ရောဂါတွေက ကမ္ဘာပေါ်မှာ အသေအပျောက်အများဆုံးဖြစ်ပြီး နှစ်စဥ် လူဦးရေ 18 မီလီယံခန့်က နှလုံးရောဂါကြောင့် အသက်ဆုံးရှုံးနေရတယ်လို့ WHO မှတ်တမ်းအရ သိရပါတယ်။

ဒီလို အန္တရာယ်များတဲ့ နှလုံးရောဂါတွေ ကိုယ့်ဆီမှာ မဖြစ်ဖို့၊ နှလုံးရောဂါရှိနေရင်လည်း ပိုမဆိုးဖို့ နှလုံးကျန်းမာရေး🫀ကို လူတိုင်းဂရုစိုက်သင့်ပါတယ်။

ဒီတစ်ခါမှာတော့ လူတိုင်းလိုက်လုပ်နိုင်တဲ့ လွယ်ကူရိုးရှင်းသော နှလုံးကျန်းမာရေးအတွက် အကောင်းဆုံးလေ့ကျင့်ခန်းတွေကို မျှဝေပေးသွားပါမယ်။

လေ့ကျင့်ခန်းမှန်မှန်လုပ်မယ်ဆိုရင် နှလုံးမှာ ဘယ်လိုကောင်းကျိုးတွေ ယူဆောင်လာပေးလဲဆိုတာ အရင်ဆုံး ပြောပြပေးချင်ပါတယ်။

📌 နှလုံးကြွက်သားတွေကို ကြံ့ခိုင်သန်စွမ်းလာစေပါတယ်။

📌 သွေးလည်ပတ်မှုကောင်းစေပြီး ကိုယ်အင်္ဂါအစိတ်အပိုင်းတွေဆီ အာဟာရနဲ့အောက်ဆီဂျင်ပို့ဆောင်ပေးတဲ့ နှလုံးရဲ့တာဝန်ကို ထောက်ပံ့ပေးပါတယ်။

📌 သွေးပေါင်ချိန်ကို ကျဆင်းစေပြီး သွေးတိုးမဖြစ်အောင် ကာကွယ်ပေးပါတယ်။

📌 သွေးတွင်းအဆီဓာတ်ကို ကျဆင်းစေပြီး နှလုံးသွေးကြောကျဥ်းရောဂါမဖြစ်ဖို့ ဟန့်တားပေးပါတယ်။

📌 သွေးတွင်းသကြားဓာတ်ကို ထိန်းညှိပေးပြီး နှလုံးရောဂါနဲ့ ဆက်စပ်နေတဲ့ ဆီးချိုရောဂါဖြစ်နိုင်ခြေကို လျှော့ချပေးပါတယ်။

📌 ကိုယ်အလေးချိန်ကို ကျဆင်းစေပြီး အဝလွန်ခြင်းကြောင့် ဖြစ်လာနိုင်တဲ့ နှလုံးပြဿနာတွေကို ကာကွယ်ပေးပါတယ်။

📌 စိတ်ဖိစီးမှုကို လျှော့ချပေးပြီး စိတ်ခံစားမှုကောင်းစေပါတယ်။

ဒီလိုအကျိုးကျေးဇူးတွေ ရရှိဖို့ ပြုလုပ်ပေးရမဲ့ နှလုံးအတွက် အကောင်းဆုံးလေ့ကျင့်ခန်းတွေကတော့

🔼 အေရိုးဗစ်လေ့ကျင့်ခန်း

အေရိုးဗစ်လေ့ကျင့်ခန်းလုပ်တာက သွေးပေါင်ချိန်ကို ကျဆင်းစေပြီး နှလုံးခုန်နှုန်းကိုလည်း မှန်စေပါတယ်။ ပြီးတော့ အေရိုးဗစ်က ဆီးချိုသမားတွေ သွေးတွင်းသကြားဓာတ်ထိန်းတဲ့နေရာမှာလည်း အသုံးဝင်ပါတယ်။ အေရိုးဗစ်လေ့ကျင့်ခန်းတွေကတော့ လမ်းသွက်သွက်လျှောက်ခြင်း🚶🏻‍♀️၊ ပြေးခြင်း🏃🏻‍♀️၊ ရေကူးခြင်း၊🏊🏻‍♀️ စက်ဘီးစီးခြင်း🚴‍♂️၊ တင်းနစ်ရိုက်ခြင်း🤾‍♂️၊ ကြိုးခုန်ခြင်းတို့ဖြစ်ပါတယ်။ ကိုယ်ကြိုက်တဲ့ အေရိုးဗစ်လေ့ကျင့်ခန်းတစ်ခုခုကို တစ်နေ့ နာရီဝက်လောက်နဲ့ တစ်ပတ်ကို 5 ရက်လောက် လုပ်ပေးလို့ ရပါတယ်။

🔼 အလေးမလေ့ကျင့်ခန်း

နှလုံးကျန်းမာဖို့ နောက်ထပ်ပြုလုပ်နိုင်တဲ့ လေ့ကျင့်ခန်းကတော့ အလေးမလေ့ကျင့်ခန်း🏋🏻‍♀️ပါ။ အလေးမတာက အဆီပိုတွေကို ကျဆင်းစေပြီး ကြွက်သားတွေကို တောင့်တင်းလာစေပါတယ်။ အေရိုးဗစ်လေ့ကျင့်ခန်းနဲ့ တွဲလုပ်မယ်ဆိုရင် သွေးတွင်းမကောင်းတဲ့ LDL ကိုလက်စထရောကို ကျဆင်းစေပြီး ခန္ဓာကိုယ်အတွက် အကျိုးပြုတဲ့ HDL ကိုလက်စထရောကို မြင့်တက်စေပါတယ်။ အိမ်မှာပဲ လက်နဲ့မနိုင်တဲ့ ဝိတ်တုံးတွေမတာ၊ Gym မှာ သွားဆော့တာ၊ ဒိုက်ထိုးတာမျိုး လုပ်နိုင်ပါတယ်။ တစ်နေ့တည်း ပြင်းပြင်းထန်ထန်လုပ်တာမျိုးကို ရှောင်ပြီး တဖြည်းဖြည်းချင်း တိုးသွားပါ။

🔼 အကြောလျှော့လေ့ကျင့်ခန်း

အကြောလျှော့လေ့ကျင့်ခန်းက နှလုံးကျန်းမာရေးကို တိုက်ရိုက်အကျိုးပြုစေတာတော့ မဟုတ်ပါဘူး။ နှလုံးကျန်းမာရေး🫀အတွက် လိုအပ်တဲ့ အေရိုးဗစ်လေ့ကျင့်ခန်းနဲ့ အလေးမလေ့ကျင့်ခန်းတွေကို ပိုကောင်းကောင်း လုပ်ဆောင်နိုင်ဖို့ ထောက်ပံ့ပေးပါတယ်။ ကြွက်တက်တာ၊ အဆစ်နာတာတွေကို သက်သာစေပါတယ်။ ကိုယ်လက်လေ့ကျင့်ခန်း မလုပ်ခင်ပဲဖြစ်ဖြစ်၊ လုပ်ပြီးရင်ပဲဖြစ်ဖြစ် အကြောလျှော့လေ့ကျင့်ခန်း ပြုလုပ်ပေးနိုင်ပါတယ်။

ဒါဆို နှလုံးကျန်းမာသန်စွမ်းစေတဲ့ လေ့ကျင့်ခန်းတွေကို လုပ်ဆောင်ပြီး နှလုံးရောဂါတွေကို ကာကွယ်လိုက်ကြပါစို့ 🎗

#မူလပိုင်ရှင်အားCrdပေးပါသည်